วันพุธที่ 22 กุมภาพันธ์ พ.ศ. 2555

เคยเล่น "ไก่ในสุ่ม"กันบ่อจ้า

มื่อนี่นึกขึ้นได้ว่า ตอนสมัยเป็นเด็กน้อยเคยได้ได้เล่น การละเล่นหลายอย่างยุ หนึ่งในนั่นกะคือ "ไก่ในสุ่ม"
แต่ส่วนมากจะเล่นในคือเดือนหงายจ้า


วิธีเล่นมีดังนี้จ้า
1. มีคนเล่นตั้งแต่ 10 คนขึ้นไป แล้วแบ่งออกเป็น 2 กลุ่ม
เช่นกลุ่ม 1 กับ 2 (เพื่อให้เข้าใจง่ายยิ่งขึ้นจ้า)


2. แต่ละกลุ่มจะมี สุ่ม 1 ใบ (ต้องไปขออณุญาต เฒ่าพ่อยุเฮือนก่อนเด้อจ้า
บ่อซํ่นจะโดน ไม้เรียว เดี๋ยวสิว่าบ่อบอก )


3.ให้แต่ละกลุ่ม แยกกันอยู่ห่างพอประมาณว่า
ต่างฝ่ายต่างบ่อได้ยินกันเวลาแต่ละกลุ่มปรึกษากันจ้า


4.แต่ละกลุ่มให้ปรึกษากันว่า ให้ไผเป็น ไก่ ที่ไปอยู่ในสุ่ม
โดยที่คนจะเป็นไก่
ต้องร้องเลียนแบบเสียงไก่ได้คือคำว่า กุ๊ก (สั้นๆจ้า)
แต่จะร้องเสียงดังหรือค่อยๆกะได้ ถ้าดัดเสียงได้ยิ่งดีจ้า
เพื่อบ่อให้กลุ่มตรงข้ามจำเสียงเฮาได้


5.เมื่อได้ ไก่ ในสุ่มแล้ว ก็หาผ้าผืนใหญ่ๆหรือสาด(เสื่อ)มาคลุม
สุ่มไว้ให้มิดชิด แล้วกะให้มีโตแทนคนนึงหรือ 2คนเฝ้าไก่ (ถ้ามีคนเล่นหลาย)


6.ส่วนคนที่เหลือ กะให้ไปลี้(ซ่อนหรือแอบ) เป็นกลุ่ม
แต่บ่อห่างจากสุ่มไก่ปานใด๋เด้อจ้า เมื่อทั้งสองกลุ่มพร้อมแล้ว
ก็ส่งสัญญาณให้อีกกลุ่มได้รับทราบจ้า


7.เมื่อพร้อมแล้ว ก็ให้กลุ่มที่ 1 ไปหาสุ่มไก่
ของกลุ่มที่ 2 โดยบอกให้ไก่ในสุ่มทำเสียงไก่ให้ฟัง
อย่าลืมเด้อจ้า คำว่า กุ๊ก สั้นๆ แล้วให้ตัวแทนกลุ่มที่ 1 ทายว่าเป็นไผ
ที่อยู่ในสุ่ม ถ้ายังทายบ่อถึกกะให้คนที่ไปลี้(ซ่อนหรือแอบ)
ของกลุ่มที่ 2 ขันเป็นไก่ให้ฟัง เอ๊กอี้เอ้กเอ้กกกกกกกกกกกกกกก
จะครบหรือบ่อครบกะได้ หลังจากนั้นจะมีกำหนดให้ทายยุ 3 เทือเด้อจ้า
(ทายแต่คนในสุ่มทอนั้นว่าเป็นไผ)


8.แล้วให้กลุ่มที่ 2 ไปหาไก่ในสุ่มของกลุ่มที่ 1 เฮ็ดคือกันกับข้อ 7. นั่นหละจ้า
ถ้ากลุ่มใด๋ทายบ่อถูกกะให้เป็นม้าถูกกลุ่มที่ชนะขี่รอบสุ่ม 5หรือ 10 รอบกะว่ากันไปจ้า


จบแล้วจ้าการละเล่นนพื้นบ้านของข้าวหอม พี่น้องเคยได้เล่นกันบ่อจ้า ขอบคุณบ้านมหาดอทคอมจ้า

ไม่มีความคิดเห็น:

แสดงความคิดเห็น